म्हारो तेजल चाल्यो सासरे,
ले लीलण चढग्यो जाट रे,
अरे लीलण ने खड़ दीनी,
तेजल ढलती मांझल रात ने,
अरे लीलण ने खड़ दीनी,
सूरो ढलती मांझल रात ने
हे कोई जावे रायमल जी वाली पोळ,
तेजल ऊबो महल में,
तेजल ऊबो महल में।।1।।

अरे काळा रा खायेड़ा,
कुण आयो म्हारे आंगणे,
अरे कड़वा बोल सासू बोल्या,
लाग्या कोरे कालजे,
अरे कड़वा बोल सासू बोल्या,
लीलण पाछी चाल ये,
कोई नुगरां री धरती रो वासो,
आज लीलण आपा नाहीं करां।।2।।

अरे पेमल जोड़े हाथ रे,
परणया रुक जावो रात रे,
अरे लाछां गुजरकी रोती आयी,
गवाड़ी रे मांयने,
हे कोई छतरी होवे तो बेगा आव,
गायां म्हारी मेणा लेगा।।3।।

अरे नागौरी ओ सूरो चढग्यो,
गायां वाली वार में,
अरे काळा ने बम्बी पे,
वचन दे दिनो ओ जाट रे,
हेे कोई मारया मेणा ने तेजा जाय रे,
ल्यो गायां लाछा री।।4।।

अरे वचनां रो बाध्योड़ो तेजल,
जावे बम्बी मात रे,
अरे डस ले नी वासक काळा,
कांई करे विचार रे,
हे कोई काळयो हारयो न धाल्यो जीत्यो,
तेजल अमर होय गयो।।5।।

अरे गुण करतां ही ओगण मान्यो,
बासक काळंया नाग,
अरे दौड़ी दौड़ी लीलण जा ज्ये,
देजे संदेशो जाय रे,
महेन्द्र लामब्या गावे तेजल थारे चरणां मांय,
हे कोई गायी रे तेजल थारी बार,
गायां गाणा एसके,
हे कोई गायी रे तेजल थारी बार,
गायां गाणा बावड़ी।।6।।